ലക്ഷദ്വീപിനായി 700 മെട്രിക് ഠൻ കപ്പാസിറ്റി ഉള്ള ഓയിൽ ടാങ്കർ. ഗോവയിലെ ഷിപ്‌ യാർഡിൽ രണ്ടാം ഘട്ട നിർമാണം പൂർത്തിയാവുന്നു.

23.03.19:ലക്ഷദ്വീപ് കപ്പൽ വ്യൂഹത്തിലേക്ക് പുതിയ ഒരാൾ കൂടി. 700 മെട്രിക് ട്ടണ് കപ്പാസിറ്റി ഉള്ള എണ്ണ കപ്പൽ നിർമ്മാണം പുരോഗമിക്കുന്നു. ഗോവയിലെ വിജയ് മറൈൻ ഷിപ്‌യാർഡിൽ ആണു നിർമ്മാണം. 2018 ജൂണിൽ കൊടുത്ത കരാർ പ്രകാരം ആണ് കപ്പൽ നിർമ്മിക്കുന്നത്. നിലവിൽ രണ്ടാമത്തെ ഘട്ടം പൂർത്തിയായതായി ഇന്ത്യൻ രജിസ്റ്റർ ഓഫ് ഷിപ്പിങ് സാക്ഷ്യപ്പെടുത്തുന്നു. കപ്പലിന്റെ കീൽ ഇട്ടതായും കീലിനോടൊപ്പം 25% ത്തോളം സ്റ്റീൽ ഘടന പൂർത്തിയായതായി പരിശോധിച്ച് തൃപ്‌തിപ്പെട്ടതായും രേഖയിൽ സാക്ഷ്യപ്പെടുത്തുന്നു. ഒരു കപ്പലിന്റെ പ്രധാനപ്പെട്ട കാര്യം ആണ്  കീൽ ഇടുന്ന തീയതി. കപ്പലിന്റെ പല സാങ്കേതിക കാര്യങ്ങൾക്കും കീൽ ലൈഡ് ഡേറ്റ് ആവശ്യമാണ്‌. ഈ കപ്പലിന്റെ കീൽ ഇട്ടിരിക്കുന്ന തീയതി കൊടുത്തിരിക്കുന്നത് 22.03.2019 എന്നാണ്.
ഗോവയിലെ വിജയ് മറൈൻ ഷിപ്‌ യാർഡിൽ 10 വർഷത്തിനിടയിൽ 94 ഓളം കപ്പലുകൾ നിർമ്മിക്കപ്പെട്ടിട്ടുണ്ട്. ലക്ഷദ്വീപ് ഭരണകൂടത്തിന് വേണ്ടി ഷിപ്പിങ് കോര്പറേഷൻ ഓഫ് ഇന്ത്യയുടെ മാർഗ്ഗ നിർദ്ദേശത്തോടെ ആണ് പുതിയ എണ്ണ  കപ്പലിന്റെ  നിർമ്മാണം.
ഉടമ ആവശ്യപ്പെടുന്ന തരം കപ്പലുകൾ ആദ്യമായി ഒരു നേവൽ ആർക്കിടെക്ടിന്റെ സഹായത്തോടെ പ്രാഥമികമായ ഒരു പ്ലാൻ ഉണ്ടാക്കുകയും പിന്നീട് വിശദമായ പ്ലാനിൽ എത്തി ചേരുകയും ക്ലാസ്സിഫിക്കേഷൻ സൊസൈറ്റി (ഇന്ത്യൻ രജിസ്റ്റർ ഓഫ് ഷിപ്പിങ് ) അതു അപ്പ്രൂവൽ ചെയ്യുന്നതോടെ ഒരു കപ്പൽ നിർമ്മാണത്തിന്റെ ആദ്യ ഘട്ടം തുടങ്ങുന്നു. പിന്നീട് കപ്പലിന് കീൽ ഇടുകയും വിവിധ ഭാഗങ്ങൾ പല സ്ഥലങ്ങളിൽ ആയി പ്ലാൻ അനുസരിച്ചു നിർമ്മിക്കുകയും പിന്നീട് അതു കീൽ മുതൽ മുകളിലോട്ട് കൂട്ടി യോജിപ്പിക്കുകയും ചെയ്യുന്നു. ഷിപ്‌ ബിൽഡിംഗ്‌ ഡോക്ക് യാർഡിലും ഷിപ്‌ യാർഡിൽ തന്നെ ഉള്ള വിവിധ വർക്ക്‌ ഷോപ്പുകളിലും വെച്ച് നിർദിഷ്ട പ്ലാൻ അനുസരിച്ചുള്ള കപ്പലിന്റെ ഭാഗങ്ങൾ നിർമ്മിക്കുന്നു. കപ്പലിന്റെ കപ്പാസിറ്റി അനുസരിച്ചുള്ള യന്ത്ര ഭാഗങ്ങളും ഈ ഘട്ടത്തിൽ കപ്പലുമായി വിളക്കി ചേർക്കുന്നു. സ്റ്റീൽ ഘടന പൂർത്തി യാവുമ്പോൾ അഥവാ കപ്പലിന്റെ ഘടനയിലേക്ക് വന്നു കഴിഞ്ഞാൽ പിന്നീട്  പെയിന്റിംഗ് ജോലികൾ പൂർത്തിയാക്കി കപ്പലിന്റെ മറ്റു ജോലികളിലേക്ക് കടക്കുന്നു. കപ്പലിലെ ജല വിതരണ സംവിധാനങ്ങളും വൈദ്യതി വിതരണ സംവിധാനങ്ങളും ഒക്കെ പൂർത്തിയാക്കുകയും കപ്പലിനെ താമസ യോഗ്യമാക്കുന്ന ജോലികളിൽ കടക്കുകയും ചെയ്യും. കപ്പലിന്റെ നിയന്ത്രണ സംവിധാനങ്ങളും അനുബന്ധ സൗകര്യങ്ങളും ജീവൻ രക്ഷ ഉപകരണങ്ങളും അഗ്നി ശമന സംവിധാനങ്ങളും എല്ലാം കപ്പലിന്റെ കപ്പാസിറ്റി അനുസരിച്ചും വിവിധ നിർബന്ധ മാനദണ്ഡങ്ങൾ അനുസരിച്ചും പൂർത്തിയാക്കി കപ്പൽ വിവിധ തരം പരിശോധനകളിലേക്ക് കടക്കുകയും ചെയ്യുന്നു.. നീറ്റിലിറക്കുന്ന കപ്പൽ പിന്നീട് പ്രാഥമിക സർവേകൾ നടത്തുകയും സീ ട്രയൽ നടത്തി പൂർണ്ണമായും തൃപ്തി വരുത്തുകയും ചെയ്യുന്നു. തുടർന്നുള്ള ഔപചാരിക നടപടികൾ പൂർത്തിയാക്കി ആണ് കപ്പൽ സർവീസ് നടത്താൻ ഉടമക്ക് ലഭിക്കുക.
നിലവിൽ ലക്ഷദ്വീപിൽ സർവീസ് നടത്തുന്നത് കൊടിത്തല എന്ന കപ്പൽ ആണ്. 700 എം ടി ഓയിൽ ടാങ്കർ നിർമ്മാണം പൂർത്തിയാവുന്നതോടെ ലക്ഷദ്വീപിന്റെ ആവശ്യങ്ങൾക്ക് മുതൽ കൂട്ടാവുകയും ചെയ്യും.

അഭിപ്രായങ്ങള്‍

ഈ ബ്ലോഗിൽ നിന്നുള്ള ജനപ്രിയ പോസ്റ്റുകള്‍‌

MV KAVARATHI BERTHED AT ANDROTH. FIRST IN LAKSHADWEEP HISTORY..

യാത്ര കീറാമുട്ടി...